ਹੁਸ਼ਿਆਰਪੁਰ ਦੇ 20 ਸਾਲਾ ਸਕਸ਼ਮ ਵਸ਼ਿਸ਼ਟ ਨੇ ਸਰਟੀਫਿਕੇਟ ਕੋਰਸ ਫ਼ਾਰ ਅਕਾਊਂਟੈਂਟਸ ਆਫ਼ ਪੰਚਾਇਤ ਐਂਡ ਮਿਉਂਸਿਪਲ ਬਾਡੀਜ਼ ਦੀ ਲੈਵਲ-1 ਪ੍ਰੀਖਿਆ ਵਿੱਚ 96 ਫ਼ੀਸਦੀ ਨੰਬਰ ਪ੍ਰਾਪਤ ਕਰਕੇ ਪੂਰੇ ਭਾਰਤ ਵਿੱਚੋਂ ਪਹਿਲਾ ਸਥਾਨ ਪ੍ਰਾਪਤ ਕੀਤਾ ਹੈ। ਇਹ ਇਸ ਪ੍ਰੀਖਿਆ ਵਿੱਚ ਹੁਣ ਤੱਕ ਦੇ ਸਭ ਤੋਂ ਘੱਟ ਉਮਰ ਦੇ ਵਿਦਿਆਰਥੀ ਦੁਆਰਾ ਪ੍ਰਾਪਤ ਕੀਤੇ ਸਭ ਤੋਂ ਵੱਧ ਅੰਕ ਹਨ।
ਇਸ ਪ੍ਰੀਖਿਆ ਵਿੱਚ 18 ਤੋਂ 60 ਸਾਲ ਦੀ ਉਮਰ ਦੇ ਲੋਕ ਹਿੱਸਾ ਲੈਂਦੇ ਹਨ। ਉਸਦੀ ਇਸ ਵਿਲੱਖਣ ਪ੍ਰਾਪਤੀ ਕਾਰਨ ਕਾਲਜ ਵਿੱਚ ਹੀ ਨਹੀਂ ਸਗੋਂ ਪੂਰੇ ਪੰਜਾਬ ਵਿੱਚ ਖੁਸ਼ੀ ਦਾ ਮਾਹੌਲ ਹੈ।
ਇਹ ਜ਼ਿਕਰਯੋਗ ਹੈ ਕਿ ਸਿਰਫ਼ 19 ਸਾਲ ਦੀ ਉਮਰ ਵਿੱਚ, ਸਕਸ਼ਮ ਵਸ਼ਿਸ਼ਟ ਨੇ ਸਰਕਾਰੀ ਕਾਲਜ, ਹੁਸ਼ਿਆਰਪੁਰ ਤੋਂ ਬੀ.ਕਾਮ (ਆਨਰਜ਼) ਦੇ ਛੇਵੇਂ ਸਮੈਸਟਰ ਦੀ ਪ੍ਰੀਖਿਆ 90 ਫ਼ੀਸਦੀ ਨੰਬਰਾਂ ਨਾਲ ਪਾਸ ਕਰਕੇ ਪੰਜਾਬ ਯੂਨੀਵਰਸਿਟੀ ਵਿੱਚ ਰੈਂਕਿੰਗ ਵੀ ਪ੍ਰਾਪਤ ਕੀਤੀ ਸੀ।
ਇਹ ਪ੍ਰੀਖਿਆ ਬੋਰਡ ਫ਼ਾਰ ਲੋਕਲ ਬਾਡੀਜ਼ ਅਕਾਊਂਟੈਂਟਸ ਸਰਟੀਫਿਕੇਸ਼ਨ, ਆਈ.ਸੀ.ਏ.ਆਈ. ਅਕਾਊਂਟਿੰਗ ਰਿਸਰਚ ਫਾਉਂਡੇਸ਼ਨ ਵਲੋਂ ਆਯੋਜਿਤ ਕੀਤੀ ਜਾਂਦੀ ਹੈ। ਇਹ ਭਾਰਤ ਦੇ ਕੰਟਰੋਲਰ ਐਂਡ ਆਡੀਟਰ ਜਨਰਲ (ਸੀ.ਏ.ਜੀ.) ਅਤੇ ਭਾਰਤੀ ਚਾਰਟਡ ਅਕਾਊਂਟੈਂਟਸ ਸੰਸਥਾ (ਆਈ.ਸੀ.ਏ.ਆਈ.) ਦੀ ਸਰਪ੍ਰਸਤੀ ਹੇਠ ਹੁੰਦੀ ਹੈ। ਇਹ ਪਹਿਲੀ ਵਾਰ ਹੈ ਜਦੋਂ ਪੰਜਾਬ ਦੇ ਕਿਸੇ ਵਿਦਿਆਰਥੀ ਨੇ ਪੂਰੇ ਦੇਸ਼ ਵਿੱਚ ਲੈਵਲ-1 ਦੀ ਪ੍ਰੀਖਿਆ ਵਿੱਚ ਪਹਿਲਾ ਸਥਾਨ ਪ੍ਰਾਪਤ ਕੀਤਾ ਹੈ।
ਇਸ ਪ੍ਰੀਖਿਆ ਲਈ ਉੱਤਰੀ ਜ਼ੋਨ ਦਾ ਕੇਂਦਰ ਚੰਡੀਗੜ੍ਹ ਵਿੱਚ ਸਥਾਪਿਤ ਕੀਤਾ ਗਿਆ ਸੀ ਅਤੇ ਇਹ ਪ੍ਰੀਖਿਆ 9 ਜਨਵਰੀ 2025 ਨੂੰ ਲਈ ਗਈ ਸੀ। ਇਸ ਮੁਸ਼ਕਲ ਪ੍ਰੀਖਿਆ ਵਿੱਚ ਦੇਸ਼ ਭਰ ਦੇ ਵਿਦਿਆਰਥੀਆਂ ਨੇ ਹਿੱਸਾ ਲਿਆ ਸੀ, ਪਰ ਸਕਸ਼ਮ ਵਸ਼ਿਸ਼ਟ ਨੇ ਆਪਣੀ ਮਿਹਨਤ ਅਤੇ ਸ਼ਾਨਦਾਰ ਗਿਆਨ ਨਾਲ ਸਭ ਤੋਂ ਵੱਧ ਨੰਬਰ ਪ੍ਰਾਪਤ ਕਰਕੇ ਇਹ ਸਨਮਾਨ ਪ੍ਰਾਪਤ ਕੀਤਾ। ਇਸ ਤੋਂ ਪਹਿਲਾਂ, 9 ਅਗਸਤ 2024 ਨੂੰ ਹੋਈ ਸਰਟੀਫਿਕੇਟ ਕੋਰਸ ਫ਼ਾਰ ਅਕਾਊਂਟੈਂਟਸ ਆਫ਼ ਪੰਚਾਇਤ ਐਂਡ ਮਿਉਂਸਿਪਲ ਬਾਡੀਜ਼ ਦੀ ਹੋਈ ਪ੍ਰਵੇਸ਼-ਕਮ-ਸਕ੍ਰੀਨਿੰਗ ਪ੍ਰੀਖਿਆ ਵਿੱਚ, ਸਕਸ਼ਮ ਨੇ ਵੀ 92 ਪ੍ਰਤੀਸ਼ਤ ਨੰਬਰਾਂ ਨਾਲ ਭਾਰਤ ਵਿੱਚ ਟਾਪ ਕੀਤਾ ਸੀ।
ਸਕਸ਼ਮ ਵਸ਼ਿਸ਼ਟ ਇਸ ਸਮੇਂ ਸੀ.ਏ ਇੰਟਰ ਪਾਸ ਕਰਨ ਤੋਂ ਬਾਅਦ ਆਰਟੀਕਲਸ਼ਿਪ ਕਰ ਰਿਹਾ ਹੈ। ਇਸ ਪ੍ਰੀਖਿਆ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕਰਕੇ, ਉਸਨੇ ਸਾਬਤ ਕਰ ਦਿੱਤਾ ਹੈ ਕਿ ਸਖ਼ਤ ਮਿਹਨਤ ਅਤੇ ਸਹੀ ਦਿਸ਼ਾ ਵਿੱਚ ਯਤਨਾਂ ਨਾਲ, ਕੋਈ ਵੀ ਸਫਲਤਾ ਪ੍ਰਾਪਤ ਕਰ ਸਕਦਾ ਹੈ। ਉਹ ਆਰ.ਟੀ.ਆਈ. ਅਵੇਅਰਨੈਸ ਫੋਰਮ ਪੰਜਾਬ ਦੇ ਫਾਊਂਡਰ ਚੇਅਰਮੈਨ ਰਾਜੀਵ ਵਸ਼ਿਸ਼ਟ ਅਤੇ ਸਾਕਸ਼ੀ ਵਸ਼ਿਸ਼ਟ ਦੇ ਪੁੱਤਰ ਹਨ।
ਸਕਸ਼ਮ ਦੀ ਇਸ ਪ੍ਰਾਪਤੀ ‘ਤੇ, ਉਸਦੀ ਦਾਦੀ ਸ਼ਾਮਾਂ ਵਸ਼ਿਸ਼ਟ ਅਤੇ ਪੂਰੇ ਵਸ਼ਿਸ਼ਟ ਪਰਿਵਾਰ ਨੇ ਅਧਿਆਪਕ ਮੋਹਿਤ ਮੋਹਨ ਦਾ ਧੰਨਵਾਦ ਕੀਤਾ।
ਆਪਣੀ ਸਫਲਤਾ ਬਾਰੇ ਗੱਲ ਕਰਦਿਆਂ, ਸਕਸ਼ਮ ਵਸ਼ਿਸ਼ਟ ਨੇ ਕਿਹਾ ਕਿ ਉਸਦੀ ਪ੍ਰਾਪਤੀ ਦਾ ਸਿਹਰਾ ਉਸਦੇ ਅਧਿਆਪਕ ਅਤੇ ਮਾਰਗਦਰਸ਼ਕ ਮੋਹਿਤ ਮੋਹਨ ਅਤੇ ਉਸਦੇ ਮਾਪਿਆਂ ਨੂੰ ਜਾਂਦਾ ਹੈ। ਸਕਸ਼ਮ ਨੇ ਕਿਹਾ ਕਿ ਉਸਦੇ ਅਧਿਆਪਕ ਮੋਹਿਤ ਮੋਹਨ ਨੇ ਆਪਣੀ ਡੂੰਘੀ ਸਮਝ, ਉਤਸ਼ਾਹ ਅਤੇ ਸਹੀ ਮਾਰਗਦਰਸ਼ਨ ਨਾਲ, ਨਾ ਸਿਰਫ਼ ਉਸਨੂੰ ਇਸ ਮੁਸ਼ਕਲ ਪ੍ਰੀਖਿਆ ਦੀ ਤਿਆਰੀ ਵਿੱਚ ਰਾਹ ਦਸੇਰੇ, ਸਗੋਂ ਉਸਨੂੰ ਆਤਮਵਿਸ਼ਵਾਸ ਅਤੇ ਸਬਰ ਵੀ ਸਿਖਾਇਆ। ਸਕਸ਼ਮ ਨੇ ਕਿਹਾ ਕਿ ਉਹ ਦ੍ਰਿੜਤਾ ਨਾਲ ਆਪਣੇ ਟੀਚੇ ਵੱਲ ਵਧਦਾ ਰਹੇਗਾ ਅਤੇ ਚਾਰਟਰਡ ਅਕਾਊਂਟੈਂਸੀ ਪ੍ਰੀਖਿਆ ਵਿੱਚ ਵੀ ਇਸੇ ਤਰ੍ਹਾਂ ਦੀ ਸਫਲਤਾ ਪ੍ਰਾਪਤ ਕਰਨ ਦੀ ਕੋਸ਼ਿਸ਼ ਕਰੇਗਾ।
ਸਕਸ਼ਮ ਦੇ ਪਰਿਵਾਰ, ਅਧਿਆਪਕਾਂ ਅਤੇ ਸਾਥੀਆਂ ਨੇ ਉਸਨੂੰ ਇਸ ਵਿਲੱਖਣ ਪ੍ਰਾਪਤੀ ‘ਤੇ ਵਧਾਈ ਦਿੱਤੀ ਹੈ। ਉਨ੍ਹਾਂ ਦੇ ਮਾਰਗਦਰਸ਼ਕ ਅਧਿਆਪਕ ਮੋਹਿਤ ਮੋਹਨ ਨੇ ਵੀ ਇਸ ਸਫਲਤਾ ਨੂੰ ਸੰਸਥਾ ਲਈ ਮਾਣ ਵਾਲਾ ਪਲ ਦੱਸਿਆ ਹੈ। ਉਨ੍ਹਾਂ ਕਿਹਾ ਕਿ ਇਹ ਸਫਲਤਾ ਨਾ ਸਿਰਫ਼ ਸਕਸ਼ਮ ਵਸ਼ਿਸ਼ਟ ਦੀ ਨਿੱਜੀ ਪ੍ਰਾਪਤੀ ਹੈ ਬਲਕਿ ਇਹ ਪੂਰੇ ਪੰਜਾਬ ਦੇ ਵਿਦਿਆਰਥੀਆਂ ਲਈ ਪ੍ਰੇਰਨਾਦਾਇਕ ਵੀ ਹੈ।
